Meghalaya a·dok Roster System ni bidingo gipin party rang baksa golporimaniko dakna ma·sigipa aro sapgiparangko seoke Expert Committee ko songna tik ka∙aha. Health aro family Welfare ni minister Dr. Ampareen Lyngdoh mangsonggipa ong·e jak o ra·anggen aro unbaksa dingtang dingtang party ni dilgiparang dongpaaniko nikanggen.
Chief Minister Conrad Sangma adita salrangna skang secretariat o bang·a gipin dilgiparang baksa golporimaniko dakenba Roster ni bidingo chanchirimna nangchongmotaniko nike adita manderangko seokaniko dakangaha.
A·doko Roster ni biding manderangni u·isretanirangko talatna aro namdapatna ia committee nirok sandiako dakgen jeon gipin dilgiparangni agananirangko aro talatanirangko knaenba mikkangchi re·mikkanganina chanchirimaniko dakgen.
A·dokni bang·a kamrangko dontongatenba committee ni chu·ongnika dipet senganiko dakgen aro adita ru·utgija salrangon parakaniko dakanggen ine Chief Minister Conrad Sangma aganangaha. Batang gimin salrango kamrangna seokanio aro ja·ku de·anio reservation policy ni niamgitan sorkari kamrangko ka·aha ineba Conrad Sangma agantalatdapaha.
Roster System ge·sa ningtubegipa niam ong·a aro chinga sorkari nokgipa ong·e manderangona iani bidingo chanchirimaniko sokatna nangchongmota aro iako dakja dipetede chinga mikkangchi re·mikkangna maming dakeba chol ong·ja ine aganenba committee o u·igipa aro sapgipa manderang ko seoke committee ko ra·gataha ine Conrad Sangma agantalataha.
