United Democraty Party (UDP) ni dilgipa aro Cabinet Minister Paul Lyngdoh Voice of the People’s Party (VPP) ni Reservation Policy ni bidingo re∙anggipa sal somoi rango so∙sojengjeng ong∙atanina matnange aganangaha. Uamangni Reservation Policy-o pangchake Khasi-Jaintia na bang∙bate seat ko dabianira politics kal∙e manderangna dakmesokanisa ong∙aia aro jatsa jat gipin baksa meligrikgija janggi tanganiko ra∙baani kamsa, ine Lyngdoh parakataha.
Unbaksana a∙doko nanga gri so∙sojengjeng ong∙atanina matnanga gnang, Khasi aro Jaintia jatrangna bate Garo jatrangan u∙i ma∙sichake janggi tanga aro politics ni gitaba chanchina sapgipa ong∙a ineba Lyngdoh agandapangaha.
