June jani 2 aro 3 tariko Prime Hub Incubation a∙doko music ni gita changa sapanirangko tang∙doatna gittamgipa changna, salgni na workshopko ong∙ate matchotataha.
Ia workshopko Durama Association of Music and Arts (DAMA) PRIME Meghalaya baksa ku∙monge, Turao donggipa PRIME Hub centre-o ong∙atangaha.
Ia workshop o dingtang dingtang gadango dokna damna changgipa aro gisiko nanggipa chadamberang bakko ra∙angaha.
Workshopni skanggipa salo Tura Baptist church ni Music Director Chesyl Momin, dingtang dingtang chord rango git ringanirangko an∙tangni u∙ianiko aro changa sapaniko skie on∙angaha. Unbaksana Silman Marak jean mingsinggipa reality show Big Boss oba guitar dokaniko niksona man∙ahachim, uaba an∙tangni guitar dokna changa sapaniko workshop-o bak ra∙enggiparangna skie on∙angaha.
Gnigipa salo Tura Music Academy ni Director aro skigipa Tengrang Sangma jean Delhi School of Music o poraibaachim, ua Piano-o gitalgipa technique rangko an∙tangni changa sapani gita skie on∙angaha. Ia workshop o Tangsrik Sangma jean Folk Music aro Instrument ni gamchataniko u∙ie uko ripingna dakdilchenggiparangoni ong∙achim uaba an∙tangni changa sapanirangko dakdile aro doke-dame mesokangaha.
Ia workshopchi Music na gisiko nanggiparangna skie on∙ani aro changa sapaniko tang∙doatna dakchakani ko ra∙bagen.
