Meghalaya a∙dok-o Common University Entrance Test (CUET) porikka ko sena centre rangko nangani bidingo a∙dok sorkari National Testing Agency (NTA) baksa agangrikanirango dakenga. Adita salrangna skang, mitam Meghalaya-ni chatro chatrirang a∙dok-ni a∙palchi re∙ange porikkako sena nangani bidingo somoi aro koros bon∙ani gimin janape aganangaha.
Beben Meghalaya a∙dok-o chubata gadango poraina CUET porikkako sena nangchongmotaniko ra∙galgenchimoba, je chatro chattri-rang a∙dok-ni a∙palchi poraina miksongengachim, uamang porikkako sena nangchongmotgen ine u∙iatangaha.
A∙dok sorkari NTA baksa golpoanirangkoba dakaha aro a∙dok-o CUET centre rangko bang∙bate nangani gimin ba janapangaha ine Education Minister Rakkam Sangma u∙iataha aro 2022-oni 2024-ona ia CUET ko sena nangchongmotgipa ong∙kujaoba je gisik nanggipa chatro chatrirang ia bilsioba apsan daken CUET porikkako seaniko dakanggen ineba aganangaha. A∙songni sorkari aro NTA baksa raken kamko ka∙anggen jedako a∙dok gimik-o chu∙onga gita centre rang dongna gita man∙gen ineba ua agandapangaha.
North Eastern Hill University aro CUET porikkarang ia jao apsan somoi-o ong∙engani gimin porikkani somoi rangko dingtangatchina GSU-ni dilgiparang Chief Minister Conrad K. Sangmako grongaha. Ia ong∙enggipa obostani gimin NEHU-ni Vice Chancellor na janapaton NEHU-ni porikkako dingtang tarikona donatskaaha ineba Education Minister parakataha.
