South Garo hills a∙jao, attamni 4 bajimango Bangladesh aro India ni sima ario donggipa Rongara (Waek) songo Bangladesh-oni niamni a∙palo palbadinge India-ona katnapbagipa manderangko sandibae Bangladesh a∙songni sima-ario chel∙chakgipa sipairang songni manderang baksa nanggrikangaha. Bangladesh sipairang AK silchidarerang aro gol∙dikrangko ra∙bite re∙baaniko songni manderang nike kenjagokaha ine parakataha.
Bangladesh ni sipairang India a∙songona napdrabaade ong∙jachim indiba niamni a∙palo palbadinggiparangko rikbaesa uamangni sima ari batangako u∙israpiljaha ine talate on∙atskaaha. Ia mamlao India a∙songo songdonggiparangko Bangladesh sipairang maming namgijako daka dongja ine India-ni sima-ario chel∙chakgipa sipairang parakatskaaha.
Bangladesh ni sipairangni sing∙anirangna ka∙a chakna amjae songni manderang uamangko a∙songtangona re∙angpilchina a∙rikgalataha. Songni manderangni mobile phone rangchi uamangko jachipchang ra∙aniko nike Bangladesh-ni sipairang uamangko dontongchina agane silchidarerangchi k∙mikkenatanikoba dakaha ine janapataha. Ia mamlako nirok sandianiko dakchina ua biapona pulis rangko watataha ine South Garo Hills-ni SP, Abraham T. Sangma kobor ra∙timgiparangna parakataha.
