2023 June jani 7 tarik Budbar salo, Garo Hills United Labour Union (GHULU)-ko salantio kamko ka∙e cha∙enggipa manderangna Awareness Program-ko Tura Nathya Samity conference hall-o ong∙atangaha.
Ia program-o Tura-ni DSP K.R Marak mongsonggipa sokgipa ong∙e bakko ra∙angaha. Unbaksana Gambegre Block-ni Labour Inspector J. Marak aro Dadenggre Block-ni A. Momin, GSU-CEC Interim Body-ni President, Zikku Balgra N.Marak aro General Secretary Bibian Momin, FKJGP Garo Hills Zone-ni President Pritam Arengh aro bang∙a gipin dilgiparang aro salantio kam ka∙e cha∙enggipa manderang tom∙anio bakko ra∙angaha.
Kam ka∙e cha∙enggipa manderang sorkarini dakchakako man∙na gita E-Shram-o register ka∙china aro labour ka∙giparang an∙tangtangni depante demechik-rangko bilsi 18 ong∙na skang child-labour-ko ka∙atjachina raken didiangaha. Maina sorkari-ni dongimin niam gita bilsi chu∙ongkugijagipa bi∙sarangko kam ba labour ka∙atode, ma∙gipa pagipako rim∙gen aro pattoko chipgen ine Pa Marak agan ku∙pattiangaha.
Una agreba Gambegre-ni Labour Inspector J. Marak, kam ka∙e cha∙enggiparang sorkarini dakchakako man∙na gita E-Shram-o register ka∙na bilsi 18-oni 60-ona man∙gen ine parakataha. Uni gimin sakanti labour-rangan sorkarini on∙enggipa namgniko man∙na gita Labour Office-o register ka∙na nanggen. E-Shram-o register ka∙na gita Aadhaar Card, Bank Pass Book, EPIC aro aadhaar card-o link on∙gipa phone number-ko on∙e register ka∙na gita man∙gen.
Labour-rang maibakai kam ka∙e a∙sel ong∙na nangode, nokdangni manderang tangka gong lakh 2-ko man∙gen, indiba E-Shram-o register ka∙ja ong∙ode, sorkarini dakchakaniko man∙jawa ineba talatangaha.
Garo Hills-o labour ba hajira ka∙e cha∙enggipa manderangna dakchake on∙na gita dingtangmancha ia GHULU-ko bikote, dal∙dalgipa pulis officer-rang aro labour officer-rang baksa ku∙monge labour ka∙enggipa manderangni janggi tanganiko nambatatna gita kamrangko ka∙enga ine GHULU-ni General Secretary Salnang Harby Sangma jinmana agandapangaha.
