Budbar salo, South West Garo Hills-ni a∙jao Mahendraganj CHC-ni ning∙o skanggipa Health & Wellness Center (HWC) ko Mahendraganj ni MLA Sanjay A. Sangma-ni jakchi do∙gako oprake on∙angaha. Ia do∙ga oprakani somoio ua jolni MDC Akhtar Ali, Zikzak Block-ni BDO, Dr. D Hajong DMHO-cum-chairman, South West Garo Hills District Health Society ni Dr. Himangshu Barman aro gipin sanna-banna niko dakenggipa officer rang, ASHA, VHC-ni manderang, unbaksana Gregapara songni gaobura aro songni gipin dilgiparang dongpae bakko ra∙angaha.
South West Garo Hills a∙jana dam-5 Health & Wellness Center (HWC) ko 15 gipa Finance Commission ni gita chamatahachim aro iarangoni Gregapara Health & Wellness Center an skanggipa changna do∙gako oprakchenggipa ong∙enga aro dongkuenggipa dam-4 HWC koba ru∙utgija somoirangni gisepon a∙bachengatnasienga ine parakataha.
Ia HWC ko ra∙baani miksonganiara manderangna nambata sanna-bannanirangko dakna aro nirok simsakna man∙na gita ong∙a, unbaksana Manhendraganj ni jolo donggipa dam 17 songrangko nangchongmotgipa sanna-banna nirangko on∙na gita dakchaniko ra∙bagen.
