West Garo Hills a∙ja-ni Gasbari Non-Government Lower Primary School-o skigipani kamko ka∙enggipako, kragija niam gri kamo rakkiengani gimin gnigipa changna am∙sandianiko dakna nanga ine songni manderang janapataha maina uamang ia ong∙a obostako name ma∙sigiparang ong∙a aro skanggipa changna am∙sandianiko chu∙ongnikjae kusi ong∙gijaniko parake badi ka∙angaha.
Ia ong∙enggipa obosta-ra Karimul Islam-ni kosako ong∙enga, jean skulo skigipani kamna (Assistant Teacher) dongimin niamko pe∙e rimnapako man∙ahachim aro koborko man∙ani gitade ua Meghalaya Teachers Eligibility Test (MTET) kon pass ka∙jachim. Bang∙a manderangan iako ma∙sie, wilwilao songdonggiparang, songko dilenggiparang badi aro soi ka∙e Rajen Hajong, jean Sub-Divisional School Education Officer (SDSEO), Dadenggre-na on∙eaha.
Ia obostani gimin badi ka∙gipa manderang, Hajongni am∙sandiataniko kusi ong∙nikjaha aro uamangni aganani gitade Hajong kakketgipa ong∙ja aro Selsella-o uni am∙sandiataniara ra∙chakna amgipa aro kakketgipa ong∙ja ineba aganangaha.
Iani bidingo Shillongni Education authorities, District School Education Officer, Tura ko gnigipa changna am∙sandianiko dakna ge∙etaha aro ia sing∙sandianirangko da∙alni bakon dakangaha. Officer-ni aganani gitade Islam ko niamgri kam-o ra∙kigenchimode uni kam oniko ra∙galaniko dakgen ine aganangaha.
