Khasi Hills-o songdongenggipa A∙chikrang reservation policy-o pangchake uamangnaba pilak man∙gnirangon Khasirang baksa apsandake on∙pachina mol∙molanirangko dakangaha.
Khasi Hills a∙jani dingtang dingtang NGO dilgiparang, songdongenggipa sakantinan pilak kam aro niamon mikkang niteani gri ong∙na nanga ine a∙dokni skotong Minister Conrad K. Sangma-na June 7, 2023 tariko memorandumko on∙aha.
On∙gimin memorandum-o dingtang dingtang niksenggipa dilgiparang soi ka∙angaha jekai Garo Student’s Union (GSU)-Khasi Hills Zone, A∙chik Holistic Awakening Movement (AHAM), South West Khasi Hills Zone, All Khasi Hills A∙chik Federation, aro United A∙chik Youth Federation.
Meghalayao 80% tribal rangna reservation policy donggenchim ong∙oba indita bilsirangoni Garo rang Khasi hills a∙jao songdonge a∙king chiga dongpilgenchim ong∙omangba reservation policy ni maming namgnikon man∙na gita amja ine uamang antangtangni chagrongenggipa nengnikanirangko janapangaha. Ia Khasi hills a∙jao songdongenggipa Garo rangna mikkang niteaniara niam gri dakengani ong∙a ineba uamang janapaha.
Uamangni songdong a∙chaani itihas aro gam-jin rango pangchake reservation policy ni man∙gniko man∙pana uamangnaba cholrangko on∙pachina mol∙molangaha.
Minggipin uamangni chagrongenggipa neng∙nikaniara skie ra∙ani bidingo ong∙a, uamangni songdongenggipa a∙jao je Garo medium school rang donggenchimoba, gipin jatko rakkianichi bi∙sarangna skie ra∙naba neng∙nikanirangko man∙enga aro iarangko namdapatna gita nanga ineba uamang agandapangkuaha. Garo ku∙sikko srange ma∙sigpa skigipako rakkina man∙genchim ong∙ode gamchatgipa aro bite gnanggipa skie ra∙aniko chatro chatri rangna on∙na gita man∙gen ineba uamang janapangaha.
