Meghalaya a∙doko bijolina neng∙nikaniko nengraatna gas oniko bijoliko bikotna a∙dokni Power Minister Abu Taher Mondal baksa gipin dilgiparang chanchirimaniko dakangaha.
“Chinga ia gas power plant-niko, a∙doko bijoliko jakkalanio dingtanggipa cholko dakna jedakode manderangna bijolina neng∙nikaniko chel∙atna man∙gen ine miksonge kam ka∙engaha” ine Power Minister Abu Taher Mondal kobor ra∙giparangna aganaha.
Adita salna skang, Chief Minister Conrad Sangma-ni jakchi Solar Mission-ko oprake on∙ahani gimin da∙o dipetde a∙doko chu∙onga gita bijolirang dongkuengani gimin ia gas ni bijoliko jakkalna nangkujawa indiba uan mikkangchina jakkalna chimonge donsoa gitasan ong∙aigen ineba Mondal agandapangaha.
A∙doko chioniko bikotgipa bijolisan dongkuengani gimin, ia bilsio mikka waanirang tik ong∙jani a∙sel neng∙nikanirangko man∙enga gita apsandake mikkang changoba neng∙nikanirangko chagrongnaba donga, uni gimin bijolina neng∙nikanirangko nengraatna dingtang dakgipa power project rangkoba a∙dokna taraken sokatna nangenga ineba aganangaha.
