Je manderangan da∙ona kingking Aadhaar ko tarikuja aro tarigija dongenga, uamang ma∙mong sorkarini on∙anirangko man∙janaba donga ine Meghalaya sorkari mikrakataniko on∙aha.
Aadhaar-o biming segate aro bank account baksa nangrimatna nangchongmota aro Meghalaya a∙dokan a∙song gimiko Aadhaar tarianio komibatgipa ong∙enga ineba Commissioner aro Secretary Joram Beda aganaha.
Jemangan a∙doko donge Aadhaar dongjachim uamang ma∙mong sorkarini dingtang dingtang welfare scheme rangko man∙janaba donga aro mongsongbate supplementary Nutrition Programme (SNP) ko, jean Anganwadi ni ning∙o ong∙achim uko man∙jaode manderang so∙sojengjeng ong∙aona sokanggen ineba Beda parakataha.
Una agreba, jerangan MHIS, central stipends aro scholarships, PM KISAN, mid-day meal, aro dingtang dingtang man∙gnirangko man∙janaba donga ine mikrakataniko dakaha.
