GHADC-ni gitcham Secretary-ni kosako sing∙sandianiko dakna HC, A∙dok Lokayukta-na bil on∙a

Garo Hills Autonomous District Council (GHADC)-ni gitcham Secretary, Hewingson A. Sangma jean tangkarangko jakkalsretani bidingo matnanganiko man∙e dongengachim uko singsandianganiko dakchina Meghalaya High Court, a∙dokni Lokayukta-na bilko on∙ataha. Ge∙etgimin gita Sangma ko rim∙na nangode high court-ni hukum donggijade rim∙na man∙jawa ine court ni division bench aganangaha.

Sangma aro unbaksa sak10 gipin MDC aro contracter rangni tangka jakkalsretani bidingo badi ka∙aniko ra∙chakna man∙jae ua a∙dokni Lokayukta-ni kosako May 18 tariko ra∙biangani bidingo HC rai on∙atskaaha. Meghalaya Lokayukta Act 2014 ni section 20 (3) o pangchake indakgipa dosi galaniko jinmani ra∙chakaniosa dakna bil man∙a ine ua Lokayukta chairman ni saksan uko matnanganiko jepangpile dakangskaaha.