Centre for Environment Protection and Rural Development (CEPARD) burung bolgrimrangko nosto ka∙ani, niam gri bol wa∙ako den∙e palani aro a∙jani biaprangko ra∙seke jakkalani bidingo a∙jani manderangna u∙iatani rangko on∙na aro bol wa∙arangko ripingna rakbee kamrangko ka∙pachina sombar salni bako sorkari aro a∙jao songdonggipa-rangni dilgipa sakantina mol∙molaniko dakataha.
Garo Hills a∙jao ong∙telaigipa sam bolrangko nosto ka∙anichi a∙arangko nosto ong∙ate chiring chibisikrangko tipataona sokatengaha, aro ian a∙jani sin∙a ding∙aniko dingtangataona ra∙baenga. Batanggimin salrango je ding∙aniko a∙doko chagronganiara bol wa∙ako simsakgijani a∙sel ong∙a ine sakantaian ma∙sie ra∙na nangchongmota.
West Garo Hills a∙jani a∙kawe jolo a∙ningni chiko bang∙e jakkalanichi aro niam gri a∙ningni rong∙terangko bikotanichi a∙ani sam bolrangko nosto ong∙atenga. Niamgri Assamona a∙arangko salangani-rangkoba niatna nangchongmotgipa ong∙enga, aro rakbee niamrangko tarie namdapatna kamrangko ka∙na gita nangenga. An∙chingni samtangtango donggipa burung bolgrimrangko ripingna skanggipa ja∙kurangko de∙na gita nangengaha. Aro uachin ding∙a sin∙aniko namdapatna gitaba mangen. Da∙alo an∙chingni sam bolko ripinganina rakbee kam ka∙anichi mikkangchi an∙chingni de su∙drangnaba namgniko ra∙bagen ine a∙jani manderangna CEPARD-ni gita u∙iataniko on∙angaha.
