A∙chik Youth Council (AYC) ia bilsini SSLC aro HSSLC porikkao Garo Hills ni chatro chatri rangni chu∙sokgiparang komibeani gimin Chief Minister Conrad Sangma ko mongolbar salo grongaha aro porikkao chu∙sokgijani kakket ja∙pangko sandie uko namdapatani kamrangko dakna nanga ine Chief Ministerko mol∙molangjolaha.
Bi∙sarangni chu∙sokna man∙gijani mingsa ja∙pangara, primary oni secondary gadangrango chu∙onga gita namgipa skie on∙giparang dongja aro skigiparangna dormaharangkoba tik ong∙e ba somoi gita on∙gija rangni a∙selba ong∙a ine AYC dol Chief Minister na janapangaha.
AYC dol Chief Ministerko, skulo skigiparangkoba salantio nirokanirangko dakna nanga aro uamangni japrako man∙gnigipa dormaharangko somoi gita on∙na nanga jedakode skigiparang an∙tangtangko on∙kange, gisiko nange bi∙sarangna skie on∙na didiatako man∙gen. Unbaksana je skigiparangan skul ka∙arang tik ong∙jaengachim uamangkoba skulrangona tanggitdik re∙ange nirok sandianirangko dakna nanga ineba mol∙molangaha.
