Meghalaya a∙dokni chatro chatri rang Central University Entrance Test (CUET) porikkako sena gita a∙dokni a∙palchi re∙na nanganio neng∙nikaniko a∙dok sorkariko nirokatchina mol∙molangaha. Don Bosco College, Tura ni chatro chatrirang National Testing Agency (NTA) ni rang∙gitdik uamangna u∙iatsamsogija Ranchi aro Jharkhand o sena donatako man∙e bi∙sarang aro uamangni ma∙aparangna bebe ra∙na amgijani ong∙aha.
Uamangna CUET porikkako June 16 tarikona tik ka∙ahachim aro admit card ko uamangna June 14 tarikosa sokatskaaha. Uamang salgni ni gisepo re∙a-doani, cha∙a-ringani aro dongchakaniko rang∙gitdik maikai chusokatna man∙gen ine neng∙nikarangko janapataha. NTA ni indake kal∙stekaniko man∙e uamangni chu∙sokani cholrangko ra∙onatenga ine matnange aganangskaaha.
Meghalaya a∙dok CUET ko sechakna dam 12 district-rango, je biapon porikkako ra∙na gita nanganirang chu∙ongachim, ua biaprango centre-rangko a∙bachenge on∙china NTA-o mol∙molatahachim ineba aganangaha.
Ia chatro chatri rangni neng∙nikanirangko nirokatchina aro NTA ko ta∙rakkale kamrangko niroke ka∙china a∙dokni Chief Minister Conrad Sangma ma∙mong sorkario mol∙molaniko dakangaha.