June jani 13 Mongolbar salni bako East Khasi Hills district administration-ni formalin ba soatgijani samko porikka ra∙e nianio na∙tokrango ua samko man∙ani a∙selo Meghalaya sorkari a∙paloniko a∙dokona ra∙napbaenggipa na∙tokrangko sal 15 na champengataniko u∙iatani adita salrangni ja∙mano na∙tokrango samko suchape watatenggipako bon∙kame rim∙a man∙aha ine parakataha.
Ia obostarang ong∙genchimoba East Khasi Hills a∙jani DC aro Food Safety-ni Commissioner Ma Rosetta Mary Kurbah, sandirikite man∙ani bidingo talatanirangko on∙na jechakangaha aro ra∙napbaenggipa na∙tokrangko champenganiko ra∙galgenchimoba, cha∙soenggiparangna mamingba ong∙jana gita ra∙napbaenggipa na∙tokrangko porikka ka∙jringaniko dakangkugen ine aganaha.
Na∙tokrangko bajar-antirango palna sim∙na gitaba skanggipa na∙tokrangko porikka ra∙ani ja∙mansa palna on∙gen aro ia mamlani bidingo talatanirangko on∙chengesa department-ni jako pakwatanggen ine Ma Kurbah aganangaha.
Rohu na∙tokrangko manderangni cha∙rongbatani gimin ia rohu na∙tokrangkon simsakbatna gita nangenga ine DC u∙iatangengon, mikkangchiba dingtangmancha nirok sandianirangko dakangkugen ine ua agandapangaha.
