MeECL-o kam ka∙gipa dolrang Coordination Committee of Registered MeECL Association and Unions (CCORMAU) a∙doko bijoli tik ong∙gijani bidingo sorkarina chakpaaniko on∙a. Uamang a∙dokni Power Minister A T Modal ko uamangna ja 2 ni dormahako manja∙engani bidingo grongaha. A∙dok sorkari bijoliko konta 8 oni 10 ona watna man∙gijaniara mikkarang komie waani a∙sel ong∙a aro bijolini bidingo plak nanggnirangni gimin uamang Power Minister baksa name dake golpoangaha ine CCORMAU ni vice-president Arju Dkhar parakataha.
MeECL ni dolrang ja 2 ni dormahako man∙jae neng∙nikanirangko man∙genchimoba uamang rakbee kamrangko ka∙an baksana Chief Minister aro Power Minister ba bijolini bidingo rakken kam ka∙aniko nikna gita man∙enga ineba Dkhar aganangaha. MeECL dol kamrangko ka∙anio neng∙nikako man∙genchimoba uamangna ka∙dongani gnang aro uamang Power Minister koba bakrime kamko ka∙china gita mol∙molangan baksana bijoli ni bidingo nanggni kamrangni gimin mikkangchiba bakrimangkugen ineba agandapangaha.
