Da∙al salni bako, hospital rango bijoli den∙aniko ra∙galaha indiba high tension feeder line ko nangrimate jakkalskana man∙gen ine a∙dok sorkari parakataha. Flaming B. Marak ni PIL hearing o division bench Meghalaya High Court ni a∙doko bijoli komiani bidingo janapanina a∙dok sorkari aganchakangaha. Hearing ko ong∙atmitingo knaani gitade Civil Hospital-ni chu∙gimik biapo high tension feeder line dongjachim ine aganaha aro iani bidingo, a∙dok gimiko namgipa bosturang, changgipa sapgipa manderang aro nambata sanna banna-nirang baksana a∙doko bijoli ko chu∙ongagita watnaba nanga, maina sagipa manderangni janggina dakchakenggipa aro oxygen rangko on∙gipa kol-rangko chalaina gita bijoliko nangchongmota ine High Court aganangaha.
Mikkangchi maibakai bijoli chu∙onggijanirangchi neng∙nikaniko man∙angkuode, hospital aro sanna banna niko dakgipa biaprango bijoliko den∙jachina, ong∙jaode diesel chi chalaie bijoliko on∙na man∙gipa generator rangko on∙skachina, jedakode maming neng∙nika gri sanna banna niko dakangna man∙gen ineba High Court agandapangaha.
Re∙anggipa antio mikkarang jimbee waani a∙sel Umiam ni chi feet 10 mangni gita tang∙doaha aro bijoli ko bikotaniko bariatna man∙gen ine a∙dok sorkari hearing ni somoio High Court na aganangaha.
