A∙dokni adita sosojeng ong∙enggipa mamlarang jekai reservation roster, harijan colony, sima-arini jingjengani, koila badingsrukani aro gari-gorarangni re∙anio neng∙nikani bidingrango a∙dok sorkarini sal 100-na MDA 2.0 ko chalaianio kamrang ka∙ani chu∙ongja ine VPP dol parakatana. VPP-ni dilgipa Batskhem Myrboh, CUET porikkani bidingo poraigipa bi∙sarangni neng∙nikaniko sorkari nina ja∙manchakaha ineba ua janapangaha. Unbaksana reservation roster-ko pil∙e nipilna uamangni dabiako sokari ong∙gijadake jatsa jatgipina gisik sagrikaniko ra∙bana dakaha ine mesokna jotton ka∙anina sorkariko matnangangskaaha.
TMC dolni vice-president, George B Lyngdoh, sorkari ni gita Common Minimum Programme (CMP) donggijani a∙selo uamangni programme aro scheme rango bang∙a cha∙bokanirangko u∙ina man∙a ine ua aganaha.
Ronnie V Lyngdoh (LO) aro UDP-ni general secretary, Jemino Mawthoh, uamangni agananio Sal 100-ni ning∙aode MDA 2.0 ni a∙dokko re∙dilanio uamangni kamrangni nama aro namgijako agana seng∙gnang dugaenga ine aganskaaha.
