A∙dok sorakrini, Education Department na kupattie on∙timgipa HM Shangpliang a∙doko poraienggipa bi∙sarangni dontongani bariroani ja∙pangara maini a∙sel ong∙manchaenga uko sandianiko ta∙raken dakna nangenga ine budbar salo parakataha.
A∙doko, poraianiko dontonggipa bi∙sarang 21% ona tang∙doaha jean a∙song gimiko skul re∙aoniko dontonggipa bang∙batgipa ong∙enga aro iarangni bidingo tale sandianiko dakna, Education Minister Rakkam Sangma baksaba aganchanchirimaniko dakangaha ine aganangaha.
Unified District Information System for Education Plus (UDISE) 2021-2022 data-oni gitade gegni gadangrango skul bi∙sarangni poraianiko dontongani bangbatenga jean class 1 oni class 2 aro class 10 oni 11 ona ong∙engachim, aro uamangni skul re∙aniko dontongani ja∙pangara mai ong∙manchaa aro ua bi∙sarangara da∙o bano maiko daktokenga aro badita sakrang kamrangko ka∙enga, iarangni bidingo sandina nangchongmota jedakode adokni manderangna neng∙nikaniko ra∙bajawa aro a∙doko kam gri donggiparang barirorojawa ine ua agandapangaha.
2021-2022 bilsirango clas 10 aro 11-o poraianiko dontonggipa bi∙sarang 20,000 gapaha ineba Shangpliang janapangaha. Uni aganani gitade elementary level-o bimung gatgiminrang 155.32%, Secondary level-o 85% aro Higher Secondary level-o 45.92% donga.
A∙doko, 3500 upper primary,1462 secondary aro 386 higher secondary skulrangsan da∙o dongenga aro ning∙tugipa songrango chu∙onga gita skulrang dongjani a∙selo matric pass ka∙ani ja∙mano higher secondary skulo napna, jillarangona re∙angna nange admission rangko man∙gijani a∙selba mingsa ong∙a. Uni gimin a∙dok sorkariko, secondary skulrangko higher secondary level-ona baridapatna nanga ineba didiangaha.
