Batanggimin sal 3-na bijoliko man·jaengani a·sel Phulbari jolo songdongenggipa manderangna aro skulrango poraienggipa bi·sarang neng·nikanirangko chagrongna nangtokenga. Ua jolo bijoliko nirokna gita FEDCO private company-na chugimik bilko on·ahachim indiba ia company manderangna chu.onga gita bijoliko on·na man·chipkujaengachim ine u∙iataha.
Ding·karini somoioba ia jolrango bijoliko name on·jaengani gimin manderang chaktopilgija ding·aniko chakna nang∙enga aro pangnan indake bijoli sirongengani a·sel manderang neng·nikanirangko chagrongna nang∙enga ine Phulbari jolna kamko ka·enggipa Peter A Sangma parakataha.
Phulbari jolrango bijoliko namdapatna gisik nangjani a·selo alamala mikka balwa rakbaon, bijoli sirongaia aro uni a·sel me·chikrang, bi·sa bakgitchakrang aro budepa butchumarang bilongen neng·nikanirangko chakna nangtokenga. Ua jolo songdongenggipa manderangni neng·nikanirangko namatna gita Power Minister AT Mondal an∙tangan ja·kuko de·na nanga ine Phulbari jolni sakgipin social activist Samgar R Sangma parakataha.
