Bilsi 70 ong∙gipa til∙lekani mamlao bilsi 5 na patoko donatako man∙a

Tura Dobakkol jolni Bilsi 70 ong∙gipa Pranesh Chakraborty Roy bilsi sokkugijagipa me∙chik bi∙sa saksako til∙ekna jotton ka∙ani bidingo POCSO-ni mokordomao bilsi 5 na patoko donataniko aro tangka gong hajal 10 ko gamna rai on∙nako man∙aha.

Pulis rangni u∙iatani gita, Roy me∙chik bi∙sako 2021 bilsini June 18 tarikni 10:30 baji mangni somoio noktangona rimange til∙ekna jotton ka∙aha. Bi∙sani ma∙a-pa ia a∙selni bidingo bakan Tura Women’s Police Station-na u∙iataniko one mokordomako ka∙aha aro POCSO kachario adita bilsi bichal ka∙ani jaman Roy dosi inako man∙aha.