Re∙anggipa salo BJP dolrang a∙dokni skotong songjinmao uamangni dolni national secretary Sunil Deodhar aro gipin dilgiparang baksa June 16 tariko tom∙bimonganiko dakangaha. Ia tom∙anio BJP-ni dilgiparangko Inner Line Permit (ILP) ni bidingo sing∙aniko dakon uamang aganchakna jechakaha ine u∙iataha. Ru∙utbea bilsion Meghalaya a∙doko ILP ko a∙bachengatna dingtang dingtang NGO dolrang aro a∙dokni Minister rang Union Home Minister Amit Shah-ko gronge iani bidingo golpogrikgenchimoba da∙onan maming ja∙kurangko de∙a dongkujaenga.
A∙dokni adita NGO dilgiparangni ILP-ko ra∙gatchina rakbee dabianiko nike, Meghalaya Legislative Assembly, 2019 bilsini December 19 tarik-o Bengal Eastern Frontier Regulation 1873-ni ning∙o ILP-ko ra∙gatchina India sorkariko didianiko dakangaha. Conrad K Sangma an∙tangan ia resolution-ni bidingo kam ka∙aniko dakaha aro pilak assembly-ni membor-rangan iako ra∙chaktokahachim.
