Re∙anggipa sukrobar attamni bako Tura Nehru park jolo, bolero pick-up ong∙gijagipa ramachipak tarakbee saldrae auto gari baksa mikkangchakgrike chagakenba auto ko salgipa mande janggi galaha, unbaksana auto o gadogipa sakgni aro bilsi 3 ni bi∙sa namen saknaaniko man∙aha ine koborangko man∙soaha.
Mikrontangchi nike agangiparangni gitade, bolero nombor ML14-6270 ong∙gija ramachipak ta∙rakbee salbaenba auto ML08D-6239 ko mikkangchrake chagakaha ine aganaha. Ua gari bolgni ni chagakani inditan bilsubeahachim, maina auto ramaoni tang∙brangenba bol japangona sokangpilaha aro bolero gariba ramaoni tang∙galpilaha.
Auto ko salgipa maming dakeba janggi tangani chol dongjaha, maina ua chagakani bilongen bilsubeahachim. Araimile, Molmegre joloni Semson M. Sangma (36) ko Tura Civil Hospital-ona ra∙angahachim, indiba skoo mata bu∙a bang∙ani a∙sel janggi galaha.
Ua auto o gadogipa ma∙ningsa jean Ma Jadambe Cheana M. Arengh (28) aro uni bilsi 3 ni demechik Emiansha Amadora M. Arengh namen saknaaniko man∙aha jemaangan Dakopre, Danakgre oni ong∙achim ine kobor ra∙timgiparang parakataha.
