Agriculture and Farmers’ Welfare Department Minister, Ampareen Lyndoh-ni re∙dilanganichi, a∙doko game cha∙giparang batanggimin salrango France a∙songchi songreangenba nambate ge∙a gamani bidingo skie ra∙baaha. France sorkarini External Affairs Ministry Meghalaya a∙dokni game cha∙giparangko Grenoble mart-o bakko ra∙nagita cholko on∙aha aro ia bakrime skie ra∙anio ge∙a gamanichi maikai sal somoi dingtanganikoba ra∙bana man∙a ukoba chanchijolangaha.
Ia skie ra∙anio dingtang dingtang a∙songrangoni bakko ra∙angaha. Chuko tarigiparang, ba∙ra dokgiparang aro gipinrang baksa melie nama skiani aro chanchianiko dakangaha. Meghalaya a∙dokni game cha∙giparang bostuko maikai tarina, katomna, badingna nanga aro bregipa manderangni nangnikaniko ma∙sigiparang ong∙a ine Lyngdoh aganaha aro gipin a∙songni bakko ra∙giparang Meghalaya ni bosturang sam jakkalgipa ong∙ama ong∙ja u∙ina sike sing∙angaha.
Ia songreange skie ra∙anio game cha∙giparang maikai bakrime kamko ka∙e chugipa gadangona chu∙sokna man∙a u∙ie ra∙na gita man∙aha maina a∙doko game cha∙giparang an∙tangtangni a∙aosa dakrongbata. Ia game ge∙e cha∙giparang dal∙gipa manderang ong∙gen aro uamang game cha∙gipaskarangna nambate game ge∙e cha∙aniko skie on∙angna gita man∙skagen. Meghalaya game cha∙gipa damsa a∙dok ong∙a aro France-o jekon ma∙sie ra∙bahachim adoko game cha∙giparangna namgniko ra∙bagen ineba Lyngdoh aganaha.
