Mijal salni bako Fishery Department ni Minister Alexander Laloo Hek a∙dokona gipin biaponiko ra∙baenggipa na∙tokrangko porikka ra∙chakram biapko tarinagita miksongenga ine parakataha. Una agreba mobile respond kit-koba tarina miksongenga, jedakode a∙dokni mongsonggipa bajar rang jekai Shillong, Tura aro Jowai-rango porikka ra∙aniko daknagita nengrae man∙gen.
Batanggimin salrango porikka ra∙chakram biaprang dongjani a∙selo a∙doko na∙tok badinge chagiparangna namen neng∙nikani ong∙achim maina formalin ba gipin samrangko porikka ra∙na gita Guwahati ona re∙nagita nangachim indioba dao ia porikka ra∙chakram biapko tarimangenchim ong∙ode neng∙nikanirangko komiatna gita man∙gen ine aganangaha.
A∙dokona ra∙napbana gita mongsonggipa rama ge 2 gnang, jean dilsa kachar rama aro dilgipinara Guwahati rama ong∙achim jekon da∙al chanchianio filing report ko on∙agita didiangaha. Da∙o dipetde bano porikka ra∙chakram biapko rikaniko dakgen ma∙sikujaenga ineba agandapangaha.
