June jani 20 tariko, Mawryngkneng ni NPP MDC, Pyniaid Sing Syiem ko Khasi Hills Autonomous District Council (KHADC) ni gitalgipa CEM seokako man∙aha. CEM ni gadangna mongolbar salo election ong∙atanio darangba unbaksa susagipa dongjani a∙selo KHADC ni Chairman Lamphrang Blah, Pyniaid Syiem ko gitalgipa CEM ine parakataha.
Uamang dolgni bakrime Khasi Hills Democratic Front (KHDF) ine KHADC ni gital Executive Committee ko re∙dilangskagen jeon NPP ni sak 12 MDC aro Congress dolni sak 6 MDC mang gnang. Syiem ko KHDF-ni Chairman na seokaha, Congress MDC Pynshngain N. Syiem ko Vice Chairman-na seokskaaha, Mawlai MDC Teibor Pathaw ko Secretary aro Mawkyrwat MDC Carnes Sohshang ko Assistant Secretary-na seokangskaaha.
KHADC-ko gital dolni bakrime re∙dilaniara sombar salo UDP ni dilgipa Titosstarwell Chyne ni kosako No-Confidence motion ko NPP MDC Bajop Pyngrope jako amma cha∙ani a∙selo ong∙aha.
