Health Minister Ampareen Lyngdoh ni aganani gita Shillong Medical College-ko rikna gita bang∙a chanchianirang gnang. Da∙o dipetde ia chanchianirang chu∙sokgipa ong∙kujaenga aro iani gimin cabinet meetingo chanchianiko dakanggen. Medical College-ko rikna gita minggni chanchisoarang gnang, uarangara PPP model ba private party-rang baksa nangrimani, aro a∙dok ni songjinmani ning∙o donggipa hospital-rang jekai Shillong Civil Hospital, Ganesh Das Hospital, Reid Chest Hospital-rangoni damsa baksa nangrime Medical College-ona ra∙dona gita man∙gen ineba aganangaha.
Gipin chanchianirangara Ri-Bhoi district ni ning∙o bang∙a private university-rang dongani gimin PPP model-o uamang baksa bakrime Medical College-ko kulina gitaba chanchisoanirang gnang ineba aganangaha. Ia chanchianirang 2012 bilsio Dr. Mukul ni Chief Minister ong∙engmiting somoio Shillongo Medical college-ko rikna gita KPC group baksa MoU-ko soi ka∙ani bilsi 5 ni ja∙man December 2017, o Reid Chest Hospital-o pangchakani ro∙ong songaniko Dr. Mukul songe on∙aha aro Ampareen Lyngdoh ba ua somoi-o PWD (Building) ni Minister ong∙e bakko ra∙angpaaha.
2018-o Conrad Sangma Chief Minister ong∙ani ja∙mano medical college ko rikna gita ua New Shillong ona ra∙jitangskaaha aro da∙o dipet gitalgipa biapni gimin name dake chanchina gita man∙kujaengani gimin bano rikgen uarangko name dake ma∙sikujaenga ine parakataha. Ampareen-ni aganani gitade ua Assam ni CM Himanta Biswa Sarma ko gronge Assam a∙dokni dingtang dingtang a∙jarango hospital-rangko medical college ona tang∙doatanirangko nikna man∙e aro niamrangko chu∙gimik ra∙gate chalaianirangko dakani gimin ua golpoan baksa, Assam-o dakanirangko ja∙rike a∙dokoba apsan daken kamko ka∙anggen. Tura medical college ni gimin sing∙aniko dakon da∙o rika cho∙anirangko dakenga aro ua an∙tangan re∙ange nirok sandianikoba dakgen ine agandapangaha.
