A∙doko mikka jimbee waanichi bijolini namroroaniko nikna gita man∙enga indiba mikkangchi bijoliko den∙a nangjana gita a∙dok sorkari mikrake dongna nangenga ine Chief Minister Conrad Sangma aganangaha. Re∙baenggipa bilsinaba mikka bitchirangko ripinge donani cholrangko sandianian ia somoio simsake dongna nangani ong∙enga jedakode re∙baenggipa salrango bijolini den∙aniko chagrongtaina nangjawa ine Conrad Sangma agandapangaha.
A∙doko dingtang dingtang bijoliko bikotgipa karkana rang chini tang∙doani aro komiani gadangrangko nirok sandie namgipa re∙mikkanganiko chanchisamsoe donna nanggen ine Conrad Sangma parakataha.
Skanggipa changna a∙doko dam gittam bijoli bikotgipa karkana rang jean Jaintia Hills-o Leshka aro Khasi Hills-o Umiam ni bijoli bikotaniko nikna gita man∙enga aro Garo Hills-ni Ganol dam nikoba mikkangchi bijoliko bikotnagita a∙bachengatgen. Bijoliko denanichi manderangna neng∙nikaniko chel∙atna gita chinga kamrangko dontongijan ka∙enga ine ua agandapangaha.
