NPP ni dilanio KHADC-osan Congress bakrimgen, MDA II ni a∙dok sorkario chinga bakrimjawa: MDC, Gabriel Wahlang

Nongstoin a∙jani MLA aro MDC, Gabriel Wahlang, NPP dolni Khasi Hills Autonomous District Council (KHADC) ko re∙dilaniosan bakrimpana man∙aigen indiba NPP chi a∙dokko dilenggipa MDA II sorkariode bakrimna man∙jawa ine kobor ra∙timgiparangna aganchakanio parakataha.

Congress dilgipani aganani gitade a∙dok dal∙begipaming District Council-ara namen dingtanga aro Congress dolni NPP dol baksa da∙o bakrimpaani a∙sel ja∙pangara uamangni daka-rika aro bewalni namgninasa ong∙a ine agane maming saloba chinga MDA sorkarina chakjawa ine ua parakangaha.

MDA II sorkarina chakpaaniko on∙ani maiba kattarangko CM ni katta ku∙rang on∙a dongahama ine kobor ra∙timgiparangni sing∙on, CM ni maming kattakon da∙o dipet knaa dongkuja ine Congress-ni dilgipa parakangaha.