Sorkari batanggimin salrango reservation policy-ko nipiltaina ine skanggipa expert committee-na member rangko sandina search committee-ko bikotaha. Uamangni expert committee-na membor rangko seokanio mandeni u∙i ma∙sigipa changgipa-sapgipako mikkango done expert committee-ona seokanian nangchongmotgipa ong∙enga ine Chief Minister parakataha.
Sorkarini gita chinga ia expert committee ni membor rangko a∙doktangoni ba a∙paloni ong∙na nanggen ine tik ka∙a dongkuja ine Conrad Sangma aganangaha. A∙dokni adita political dolrang aro NGO rang, reservation policy-ko nipilna expert committee membor rang a∙doktangnin ong∙na nanga ine a∙kangangskaaha.
Search committee membor rangko sandina a∙bachengengaha aro adita bimingrangko chinga sandie donaha aro sandianiko dakangkugen ine Chief Minister agandapangaha. Expert committee-na namgipa membor rangko chingna nanga jedakode sakanti a∙doko songdongenggipa jatrang apsan melie mikkang niteagri kamko ka∙na man∙gen aro mikkangchi neng∙nikaniko ra∙bataijachina namgipa sakki aro biteko on∙a amgen ine ua agandapangaha.
