Tura jilao mingsingbegipa anti cha∙ram ba super market, chakna amtopilgija sengbegipa biap damsa ong∙angenganiko nike saksa social activist ba songsalna dangdike on∙gipa, Jaynie N Sangma ni parakatani gitade batanggimin salrango je nosto ong∙giparangko rang∙gitdik ta∙rakbee taridapgiminrang da∙on nosto ong∙pilengaha ine u∙iataha.
Ia super market ni ka∙mabatgipa gadango me∙su palgipa jolo, nalarangni chi setagija jokprakanichi aro pakmarangoni chi rang selanichi, unbaksana jabolrangko simsakgija galani a∙selrango namen sengbegipa bibarangko chakna nangenga.
Bang∙a dokan nokgiparang ia chakna amtogijagipa senganina matnange uamangni suk ong∙gijaniko parakatokaha. Anti damni jabol galchakramgita chacha senganiko, Tura Municipal Board (TMB) niroke rang∙san kam ka∙e on∙na nanga ine Jaynie Sangma aganangaha. TMB ni CEO, Rikse Marak na iarangni bidingo u∙iaton, contractor ni kosako kamrang ka∙a tik ong∙ja ine matnange aganangskaa.
