PA Sangma Stadium-o ong∙a a∙selna sing∙sandianiko dakna magisterial inquiry-ko a∙bachengata

Tura o gital dake rikdapenggipa PA Sangma Sports Complex ni pakmarang adita mikka jimbeanichi a∙a rurongdape be∙gruani a∙selo ong∙a obostako, sing∙sandianiko dakchina magisterial inquiry-ko a∙bachengataha. Ia mamlani bidingo je bosturangko pakmako rikna gita jakkalachim contractor-ni kosako sing∙sandie sakki man∙anio pangchake rakbea nalis ka∙aniko dakanggen ine West Garo Hills ni DC, Jagdish Chelani aganangaha.

Sing∙sandianiko dakna gita Assistant Commissioner jako ra∙anggen ine DC u∙iataha. Ia a∙selni ja∙pangko sandia man∙kujana kingking iani gimin mamingkon agana man∙kujawa indiba sakkirangko chu∙ongagita man∙ani ja∙manosa raka nalis ka∙ani ba sastiko on∙a amgen ine ua agandapaha. Skanggipa ramarangko champengatenggipa a∙arangko aro bosturangko galchenganian chingni dakchengna nanggni kam ong∙enga ine ua parakataha.