Sorkarini kamrangko namdapatna Right to Information (RTI) ka∙rakgipa aro ACHIK dolni Vice President, Greneth M Sangma, Industrial Training Institute (ITI) o instructor ba chatro chatrirangko ‘Employment and Craftsmen Training’ ni a∙bao dilgipani kamna gipin jatko ra∙napaniko namnikjae sing∙doaniko dakangaha.
Ua uni sing∙doaniko, Meghalaya Job Reservation Policy, 1972 ni niamo pangchake kraa ong∙ja ine parakatenba jattangan chu∙ongagita bida gnanggipa aro kamna seokako man∙a kragipa manderang dongoba ia kamna gipin jatko seokaha ine parakataha.
Khasi Hills a∙jao ITI bida noko bang∙a kamrangna bangbang gapatgija donggiparang bang∙begenchim ong∙oba, Garo Hills ni ITI bida noko kamrangna ra∙napanio bilsi 4 oni 7 mangna contractual ba soi ka∙grike kam ka∙enggiparangna on∙ani pal gipin jatnasa on∙skaenga ine ua janapangaha. ACHIK dol unbaksana Asian Development Bank ni tangka chamatgiparangko jakkalani bidingo ja∙pang ja∙dilrangko sing∙sandianikoba dakanggen ine ua parakataha.
