Bristibar salo College of Teachers Education ni seoka man∙gimin students union ni chatro-chatrirang, Education Minister Rakkam Sangma ko gronge B.Ed College o seat rangko ge 100 ona bariatchina aro ia collegeo M.Ed course ko a∙bachengatna gita didiangaha . CTE-SU ni President Thomas M. Marak ni aganani gitade College of Teachers Education o mingsa nangbatgipara, poraienggiparangna biapko bariatanian ong∙a maina bang∙bata manderang ia college o napna nangnikgiparang bang∙en gnang, indiba biaprang komiani a∙sel bang∙batan napna cholko man∙jaenga.
Ia dabianiko mikkangchini namgnina chatro-chatrirang, skulni skigiparang aro A∙chik jat nangrime sa dabianiko dakenga jedakode jemangan mikkangchi skulrango skigipa ong∙na ske poraianio, maming neng∙nika gri poraianiko man∙an baksa nambata gadango poraianiko skie ra∙na cholko man∙a gita asongchakani biaprangko bariatna nanga ine Education Minister ko mol∙molangaha.
CTE-SU ni President ni agantalatani gitade Masters ba M.Ed ko a∙bachengatna miksonganiara jemangan skigipa ong∙na miksongenga aro skulrango ka∙enggipa skigiparangna chubata gadango skie ra∙aniko dakna Masters ko nangnikenga ine parakataha.
M.Ed course-o dingtangmancha nambate aro talbate u∙i-masie ra∙na skigipa ong∙ani nangchongmotgipa gun aro skie on∙a chu∙ongagita changa sapaniko skigiparangna pakwatna, M.Ed course ko Rongkhon CTE o on∙a nangchongmotgipa ong∙enga ine CTE-SU ni General Secretary Anthony A. Sangma aganangaha.
