Turaoni adita chel∙ao donggipa Rongram antioni jeng jabolrang chiringrango skatang galani a∙sel, Ganol Hydroelectric project ni dam o skonganiko nikna man∙aha. Mikkarang jimbee waanichi aro chirang dal∙beani a∙selo je batanggimin salrango jabolrang chiringrango skonge dongengachim uarang dam-ona ta∙rakbegipa chi baksa balpakbaskaaha.
WGH a∙jani DC, Jagdish Chelani, an∙tangan ua biapona re∙ange Ganol project-o kam ka∙enggiparangko gipin dolrang baksa ia jabolrangko rongtalatchina ge∙etaniko on∙angskaaha. Uni ge∙ataniko man∙e TMB, Rongram Bazaar Committee aro social organisation, Ganol HPP baksa melie Sukrobar pringni rongtalataniko dakangskaaha.
Bristibar salo, WGH ko nirokenggiparangni tom∙e chanchirimanio, Rongram Bazaar Committee-ni jabolrangko skatang chiringrango galaniko champengna man∙jani a∙selo, uamangni kosako gong lak 1 ko ra∙china tik ka∙angskaaha. Ia tangkarangko Rongram antiko rongtal an∙talanina jakkalskagen ine u∙iataha.
