Re∙anggipa somoio Khasi Hills Autonomous District Council (KHADC) o rang∙gitik biloniko ra∙onani ja∙pang ja∙dilara Deputy Chief Minister Prestone Tynsong ni a∙selsa ong∙a ine UDP dosi gale aganangaha. MDA 2.0 sorkari rikanio NPP baksa UDP bakrimachim aro Congress mikkangchakgrikgipa dolni ong∙genchimoba UDP ni Titosstarwell Chyne-chi dilenggipa executive committee oniko ra∙galna mangsonge NPP baksa bakrimaha ineba aganangaha.
Ia be∙gruaniara rang∙san aramgri goera goa gita ong∙aha aro uamangni daka kam jakbikpilanisan ong∙ja indiba politics o niamgri ong∙gija kam ka∙anisa ong∙aha ine UDP oni kattarang ong∙kataha.
UDP pangnan ka∙rimska baksa ku∙mikchetgrikaniko dal∙e ra∙a jedakode maming jingjengata gri a∙dokni neng∙nikanirangko dingtang dingtang dilgiparangchi nambate chu∙sokatna gita man∙gen ine kobor ra∙timgiparang na parakataha.
Ian UDP ni Khasi aro Jaintia Hills o bilakaniko nike kengni ong∙gen ine chanchigiparangni kam ong∙a aro ia obostarang ong∙genchimoba manderangni neng∙nikanirangko kim∙kim ong∙e dangdike on∙a ja∙ku de∙angkugen ineba agandapaha.
