West Garo Hills-ni Deputy Commissioner Jagdish Chelani Ganol Hydel project-ko rongtalatani bidingo agantalatengon Chibragre Ganol Hydel project-ko rongtalatengmitingo mikka wataijagenchim ong∙ode sal gittam ba sal bri-ni gisepon jabolrangko rongtalatani kamko matchotangen ine u∙iataha.
Batanggimin salrango mikka jimme chi dal∙ani a∙sel Rongram chiringo chimonge donggipa jabolrangko Chibragre Ganol Hydel project dam-ona man∙pakangaha aro ua chimonggimin jabolrangko rongtalatna nangao ga∙akaha. Dam ka∙machina jokangenggipa chiko Tura PHE-ni manderangna chiko sualani bidingo chi namama namja ine sing∙anirangna aganchakengon, jabolrang dam-osa chimongani gimin ka∙machina jokanggipa chirango jabol dongja unbaksana PHE-ona chi sokangengon ua chirangko name cheke rongtalatesa Tura songjinmaona sokatenga ine ua agantalatangaha.
Iani gimin ua aganangengon, indakgipa obosta da∙o skanggipa changna mikka jimbee waani a∙sel ong∙aha aro mikkangchi ong∙taijanagita District Administration simsake aro rakbee kam ka∙angen ineba ua u∙iataha.
