Adita salna skang Congress dol, MDA 2.0 ni BJP dol baksa bakrimaniko dontonggenchim ong∙ode uamang chakpana kusi ong∙aigen ine Vincent Pala ni agangipana, Deputy Chief Minister Prestone Tynsong, MDA sorkari jekai a∙bachengaoni kam ka∙baengachim apsan daken bilsi 5 bon∙aonan kam ka∙angkugen aro Congress dolko rimnape kam ka∙na uamangni sorkario biap dongja ine ua parakataha.
BJP ni ku∙watimgipa Mariahom Kharkrang ni aganani gitade Congress dolni MDA sorkarina chakpaaniko on∙a miksonganiara manderangna dakpinike mesokanisan ong∙aia ine matnange aganangskaaha. Congress dol a∙doko aro a∙song gimiko dubienggipa jahas gita chacha bon∙angengako nikesa uamang MDA 2.0 sorkari baksa bakrimna miksongenga ine ua agandapangaha.
