A∙songni Prime Minister Narendra Modi-ni US-ona songreangmiting somoio, New York songjinmani sorokrango, a∙songo dongenggipa manderangni kosako ong∙gija dakanirangko namnikjae, truck garirango noksarangko tape jegalaniko dakan baksa New York songjinmani dilgipa Joe Bidenko a∙songni PM Modi ni kosako sing∙doanirang dakchina ba ge∙etangaha.
Joe Biden-ko, chatro-chatri rangni namgnina re∙chakatdilgipa Umar Khalid-ko maming bichal gri sal hajalsa batpile pattoko donatani bidingo aro Muslim, Christian, Dalit rangni kosako sinjetani aro ong∙gija dakanirangko nirokjaani bidingrango Modi-o sing∙aniko dakchina aganangaha.
Unbaksana da∙o Manipur-o ong∙enggipa obostarang-o sak sotsku manderang so∙otako man∙an baksa sak ritcha gittam manderang saknaanikoba man∙ahachim, indiba ua saksa a∙songko dilgipa ong∙e nirok simsakaniko dakgija dongenga ine manderang matnange aganangaha.
