Robibar walni 10 baji mango, East Khasi Hills a∙jani Dawki sepango donggipa Umsyiem songni sima-ari jolni BSF a∙tipo nirokenggipa aro songni manderang baksa nanggrikanio sak bonga manderang aro sakgni BSF sipairang saknaaniko man∙aha ine koborko man∙soaha. Koborko parakatani gitade ua jolni manderang BSF a∙tipko ro∙ong aro botolrangko jakkale goani a∙selo sakgni BSF rang saknaaniko man∙aha ine parakata.
Adita salna skang Bangladesh a∙song china bosturangko badingsrukgipa manderangko rim∙ahachim aro uamangko rim∙ani a∙selosa ma∙sina man∙gijagipa manderang uamangni a∙tipko chadrape ro∙ong aro botolrangko goaha ine BSF, Meghalaya Frontier Inspector General, Pradip Kumar aganaha. Uamangni chadrapaniko nike BSF chelchakgipa dolrang ka∙mikkenatnagita bangbango slaiko gopongna nangaona sokaha aro chadrapgipa manderang slai gopongana kene katpripraenba mata bu∙ako man∙aha ine koborko man∙soaha.
