Da∙al salni bako Meghalaya a∙dokni Speaker Thomas A. Sangma, Ganol hydro project dam-o rongtalataniko dakenggipaona re∙ange nirok sandianiko dakangaha. Tura songjinmani bang∙a manderang Ganol chiringniko chi ringnagita jakkalengani gimin rongtal an∙talaniko rakkina nanga ine Sangma agananga.
Unbaksana chiringko rongtalataniko nike ua dingtang dingtang dolni sakanti kam ka∙giparangko aro ua jolo donggipa manderangko mitelpilani kattarangkoba aganangaha. Ia nirok sandiao West Garo Hills-ni DC Jagdish Chelani, MCCL ni Vice Chairman Shri Mathias Marak, MePDCL ni official rang, NPYF-ni National Secretary Dabo M Marak aro gipin Officer rangba unbaksa dongpaaha.
