Hynniewtrep National Youth Movement (HNYM), Mawjam Unit Mawkynrew constituency-ni Vice President Dines Mynsong ko, sonibar walni sku bajimango, kam ka∙chakram biap Umpling-oni noktangchina Laitkor gita re∙angani somoio, Mawblei jolo denggu dakgipa manderang matsramgipa silchi darerang baksa chadrape gitoko rataha.
Ia ong∙a obostani bakan uko Civil Hospital ona ra∙angaha aro nambate sanna banna niko dakna Robibar pringo NEIGRIHMS-ona rimangskaaha aro rasong gnangbee an∙sengplaniko man∙enga ine koborko u∙iataha. Mynsong ni aganani gitade je manderangan uko chadrapahachim uamang pekgipa bosturangko jakkalgiparang ong∙a aro ia obostani ja∙pangko talbate u∙ina pulisrang am∙sandianiko dakenga ine parakataha.