Shillong-ni MP aro Meghalaya Congress dolni President, Vincent Pala-ni MDA oniko BJP party-ko ra∙galgenchim ong·ode Congress dol sorkari baksa bakrimaniko on·gen ine agangipa kattani kosako aganchakengon, uni agananirang gokani katta ong·a aro ru∙utbea somoirangna napchipe dongani ja∙mano an∙tangko songbadrango nakatna ske agane roanisan ong·aia ine BJP dolni President Ernest Mawrie matnange aganskaaha.
Batanggimin salrango NPP ko BJP ni bak ong∙a ine agangenchimoba da∙o Congress dolni sorkari baksa bakrimpana skaniko mesokaniara uamangni ka∙dongani grigipa, cha∙chipilgipa aro bilna ka∙oksie sakgipinko galona jotton ka∙e agane roanisan ong·aia ine Mawrie agandapangaha.
