Re∙anggipa bilsirango sorkarini rika-cho∙ani kamrangko ka∙anio nosto ong∙anirangna mijal salni bako Congress MLA aro opposition Chip Whip Saleng Sangma, kusi ong∙gijaniko parakataha. Adita salrangna skang sorkarini rikenggipa P A Sangma stadiumni pakma be∙gruaha aro apsandaken batanggimin bilsio Assemblyni domeba be∙gruaha, ISBT nok chi selaha aro Pynursla ramaba nosto ong∙ahani gimin, ia ong∙enggipa obostarangna an∙chingara contractor rangko, engineer rangko ma manderangko matnanggenma? ine ua sing∙doangaha.
Stadiumko jako ra∙gipa contractor ko West Garo Hills-ni DC be∙grugimin pakmarangko gital rike on∙china ge∙etaniko janapan baksa, indita dal∙begipa stadium-o maina nalarangko chonne tarina nanga ine Sangma sing∙angkuaha. Ia obosta ong∙ani a∙selan manderangna chamgimin tangka rangko indin bon∙atenga maina iako rikpiltaina apsan tangka-paisako jakkalangna nangkugen ine ua agandpangaha.
West Garo Hills SP ni aganani gitade, ia obosta ni gimin Tura-ni BJP MDC Bernard Marak mokordoma ka∙ahachim indiba ia obosta a∙a rurongani a∙selsa pakma be∙gruaha, unbaksana darang mandeni janggi gimaani dongja aro obosta ong∙gipako mokordoma ka∙gipa baksa see-jote on∙gipa chu∙onga gita lekkarang dongjani gimin namen chanchina neng∙beani ong∙a ine aganangskaaha.
