PA Sangma Stadium-ni pakma be∙gruani a∙selko am∙sandichina gita a∙dok sorkarini technical team expert ba rika-cho∙anio changgipa sapgipani pal Magistrate ba sorkarini bichal ka∙gipakosa am∙sandina bil on∙ani gimin TMC dolni Vice President, George B. Lyngdoh sing∙doaniko dakatskaaha. Magistrate rika cho∙ani kamo maming bak nanga dongja maina iara niam-retini mamla ong∙ja ine ua aganangaha. A∙ani gimin u∙igipa aro ma∙sigipa technical dolni Chief Engineer-kosa Magistrate-ni pal watatskae am∙sandianiko dakatna nanga ine ua sorkarini kamko namnikjae parakangaha.
Rikdapenggipa stadium-ni be∙gropani ja∙manoba sorkari Badri Rai-na contract ba rikna on∙ja ine agananiara uamangni pa∙sikanisan ong∙a aro contractor-rangko sorkari naljokatna jotton ka∙sikaenga ine George B. Lyngdoh parakangaha. Ia pilakan tangka paisarangko jakkalsretani aro namgipa bosturangko rikanio jakkaljani a∙sel ong∙aha ine ua agandapangaha.
