The Learning Sanctuary Tura ni principal, Tyrone D’Brass, skulo skigiparangko ADHOC-o kamna ra∙napaniko dontongatna nanga ine aganangaha. Skulo Head Master ni kamna adita bilsi ba jana mangmang ra∙napanichi maming nama biteko skulna aro bi∙sarangna on∙a man∙jaengani gimin, skotong skigipa ba Head Master ko permanent ba chu∙gimik bilo kamko ka∙na rakkina nanga ine ua janapataha.
A∙doko B.Ed college-rang dambongasan dongani gimin, skulo nambata skigiparangko man∙a gita bang∙bate B.Ed college-rangko nangengkua ine ua parakataha. Skulo skigiparang baksa poraienggipa chatro chatrirang aro ma∙a-paa rangni gisepo tom∙bimonganiko dakrongna nanga ineba ua agandapaha.
Unbaksana skul nokrangko tarie on∙a aro namgipa asongchakanirangko on∙china, poraichakram biaprango chasong gitalo skina jakkalgipa audio-visual classroom rang dongna nanga ine u∙iatangkuaha.
