Garo Hills-ni TMC dol a∙doko Meghalaya Resident Safety and Security Act (MRSSA) ko ra∙gatchina sorkariko dabiangaha. Meghalaya a∙dokona Manipur-oni napbaenggipa manderang bang∙baengani gimin mande jelaoniko, dacoit aro cha∙ue cha∙aniko, mande rim∙srukani aro bang∙a songsalko so∙sojengjeng ong∙ataniko name nirok sandie naljoke rakkina a∙dok gimikon MRSSA ko ta∙rake ra∙gatna nanga ine TMC dolni dilgipa Richard Marak sombar salo parakataha.
MRSSA ko ra∙gatgenchim ong∙ode, niam gita jatni daka rika bewalrangko ripingangna dakchakgen aro mikkangchi a∙sel ong∙gnirangoniko a∙dokni manderangna naljokaniko on∙gen ine a∙dok sorkariko ia niamrangni bidingo manderangna talate on∙an baksa simsaksona nanggnirangko mikrakate on∙china, Richard Marak mol∙molataha.
