A∙doko bosturangni damrang batroroaniko nike, Congress ni MLA, Saleng Sangma ia mamlani bidingo sorkariko nirokatchina gita aganangaha. Uni aganani gitade, kangal cholgri rangsan iani gimin agana ong∙aija indiba man∙e cha∙giparangba dam bariani bidingo namnikgijaniko agananirang donga ine ua parakataha.
Songsalo janggi tangenggipa cholgri manderang, an∙tangtangni nokdangna salantio nangchongmotgipa cha∙ani ringanirangko brena nangan baksana nok para gamna, skul fees rangko gamna, dedrangna ganding chindingrangko ra∙na aro bang∙a gelna man∙gijagipa neng∙nikanirangko chagronge dongna nangenga ine ua agandapaha.
Badinge cha∙giparang an∙tangtangni namnika gita bosturangko dingtang dingtang damo palenga aro bosturangni damrang batrorogenchimoba manderangni man∙gni dormaharangde de apsanan ong∙engkua ine ua janapangaha.
Songadamo janggi tanggiparang noktango an∙tangtangni ge∙gipa cha∙anirangko cha∙e cholioba, songjinmao dongenggipa manderangnade bilongen neng∙nikanirang gnang, maina cha∙ani ringanina, bijolina, nok para rangnaba gamnagita nanganirang donga ine ua aganangaha.
