A’chik Conscious Holistically Integrated Krima (ACHIK), roster system ko ra∙gatanio chasongna dakbaenggipa kamrangko nipilesa reservation policy-ni bidingo kamrangko ka∙na nanga ine sal 7 ni gisepo sorkarioniko bon∙kamgipa aganchakaniko dakchina dabiangaha. ACHIK dolrang uamangni a∙bachengo dabigimin kattarango pangchake roster system ko namgipa bewalo ra∙gatanichisa jatantina nama ja∙kuko dena man∙gen ine parakangaha.
Pilak public sector, department-rango aro dingtang dingtang gadangrango A∙chikrangni man∙a nanggni bak rengsiko on·a man·e, batanggimin salrango ja·rikbaani gita che·eme niplesa reservation policy ko kam ka·aniko uamang sorkarioniko nangnikenga.
Roster system-ko kakket bewalo ra∙gatanichi a∙doko songdongenggipa Scheduled Castes (SC), Scheduled Tribes (ST), Other Backward Classes (OBC) aro gipin man∙a kragipa jatrang namgniko man∙a amgen ine ACHIK dolni president Thomas M Marak aganangaha. Iako dakanichi batanggimin salrango A·chikrangko onchep-sinchepaniko ba kakketgijao kam ka∙anirangko nipile namgniko ra·bana amgen ine ua agandapangaha.
Sorkari uamangni dabianiko namgipa chanchianirangko dake, songdongenggipa jatni dilgiparang baksa golpoenba kakket aro bebeo kamrangko ka∙nagita, sal 7 ni gisepo aganchakna nanggen ine uamang janapataha
